Chegou para quedarse. Dende que se instalaron os primeiros portais especializados en Crowdfunding ata hoxe, non pasa unha semana sen que un proxecto galego busque apoios e financiamento a través desta vía. As solucións de apoio popular, micro-mecenado, compra anticipada, ou financiamento baixo recompensa, resultaron ser unha ferramenta excepcional para distintos fins.
O primeiro é obvio. Financiamento. Nuns momentos nos que os apoios á creación e á produción son practicamente inexistentes, os creadores e produtores buscan directamente ó consumidor final, xa que os intermediarios parece que seguen desaparecidos. É un xeito rápido de conseguir liquidez case inmediata, e de reducir o risco inversor.
O segundo é a validación social. Qué sentido ten sacar adiante un proxecto cultural que non interesa a ninguén? A validación por parte da comunidade receptora dunha práctica cultural resulta ser un filtro tan directo, e tan decisivo para a viabilidade do proxecto, que, se pasa ese primeiro filtro, ten a súa vida asegurada, máis aló da propia consecución inicial do proxecto.
Á espera dunha política xeral de Mecenado, seguen sumándose iniciativas de todo tipo, fundamentalmente dentro do ámbito cultural, para instaurar definitivamente esta vía de financiamento e consolidación social das propostas culturais. Quén sabe, igual o día que a Administración pase a fincarlle o dente ó Mecenado, igual ese día acaban tamén co Crowdfunding. Son capaces...