Músicas ao Vivo dálle unha gran importancia á mocidade. O descubrimento das boas músicas deste país e as voces da nosa rapazada é unha aposta polo futuro de todas e un xeito de facernos mellores.
O II proxecto didáctico ligado aos Premios Martín Códax da Música foi enviado aos centros educativos galegos para fomentar a música galega dentro dos centros escolares a través do traballo cos proxectos presentados nos Premios.
Como o ano pasado, incluiremos todos os podcast que fagan os rapaces na radio online dos Premios e dándolle visibilidade tamén a través das nosas redes sociais.
O proxecto que propoñemos é crear unha serie de programas en formato podcast (ficheiro mp3) para divulgar e dar a coñecer as diferentes bandas e estilos musicais que se presentan aos Premios Martín Códax da Música. No proxecto explícase a liña de traballo así como a súa xustificación curricular. Está dirixido principalmente ao alumnado de 5º e 6º de EP e tamén de 2ºESO.
O prazo límite para a recepción dos podcasts é o 29 de maio. Os proxectos teñen que ser enviados a info@musicasaovivo.gal (preferiblemente a través dun link para a súa descarga)
Como dicía o noso queridísimo Fran Pérez “Narf”: “Somos dunha tribu que acredita no futuro”.